Readings: 1st: Ex 17: 3-7; 2nd: Rom 5: 1-2.5-8; Gos: Jn 4:5-42
“Shan nga gaw katsi ai hka shi hpe ra marit nga ai zawn, nye a wenyi mung nang hpe marit nga nngai, nye a Karai Kasang e (Shk 42:1) Dai ni, chyoi pra ai Kanu Nawku hpung gaw, Htani Htana Hkrung nga ai asak Hka rai nga ai Hkristu hpang de sa na matu n-gun jaw nga ai.Htani htana hkrung ai hka hpe myit masin yawng de lwi shangun na matu, htunghking a pat shingdang ai lam ni, lachyen lahka ai lam yawng hpe dawm kau na matu shaga nga ai.
Hka gaw asak hkrung lam yawng a matu ra kadawn ai lam rai nga ai. Hpaji masa hku sawk sagawn ai hku nga yang, hka gaw hkum hkrang hta nga ai ntsin yawng hta tsa lam shadang 60-75 daram lawm ai. Dai majaw, kadai hpe mung tsep kawp shaw kau ai (sh) hka shaw kau ai gaw si hkrum na re. Ga Shaka Dingsa hta hka gaw wenyi myit dik lam hpe tsun shaleng ai ga shadawn langai mi rai nga ai (Is 12, 3) .
Dai ni na daw 1 gaw, Israela amyu masha ni nam mali kata e hkrum sha lai wa sai tsin-yam tsindam ni hpe tsun dan nga ai. Egutu mung hta shaning mali tsa sumshi ning tup mayam tai nga ai hpang Karai Kasang gaw shanhte hpe shalawt la na matu du sa ai (Pru 12, 40). Raitim, shanhte gaw Mawshe hpe mung, Karai Kasang hpe mung, hka hpang gara ai majaw, marawn ma ai. Karai Kasang gaw Mawshe hpe lunghkrung hpe kayat na matu matsun ai. Dai kaw nna hka pru wa ai. Israela masha ni lu nna hkru kat nga ma ai.
Mawshe ahtawk ai lung rawk kaw na hka pru wa ai gaw, ga shadawn hku nna Hkristu hpe tau hkrau tsun dan ai lam rai nga ai. Shi gaw anhte a hkye hkrang la ai lunghkrung mung, anhte a htani htana hkrung ai hka mung rai nga ai. Ndai lusha gam ladaw masum ya ngu na Laban shani hta mung, prat tup na lunghkrung rai nga ai Hkristu kaw nna lwi pru wa ai hkrung ai hka kaw na wenyi lu sha ra nga ga ai. Dai majaw, ndai Lenten aten hta anhte a wenyi hka hpang gara ai lam hpe shazim kau lu na matu: “Hkye hkrang la ai hka htung kaw na hka ja la ra ai” (Ish 12:3).
Daw Lahkawng hta, Hkristu a tsawra myit hpe “Chyoi Pra ai Wenyi e anhte a myit masin hta ru bang ya ai” ngu ai lam hpe Pawlu tsun dan da ai. Ndai shara hta, Pawlu gaw hka hpe “ru kau na” ngu ai ga si hpe lang nna, asan sha tsun da ai. Anhte a prat gaw, Hkrung ai Hka Hkristu n lawm yang, kade daram karum shingtau lam n nga ai, ya du hkra rai nga ai hpe mung shadum ya nga ai. Tsun mayu ai gaw, Hkristu gaw shi si hkam ai hku nna anhte a asak a npawt nhpang shi hkum nan tai wa sai.
Dai ni na kabu gara shiga hta, Yesu gaw Samari numsha hpe Htani Htana Hkrung ai Hka shi hkum hpe madun dan nga ai. Ndai lam gaw anhte a prat hta Hkristu a ahkyak ai lam hpe madi madun nga ai. Ndai kaw nna sharin la lu ai lam gaw, amyu rusai, htung hking hpe madung tawn nna garan ginhka ai lam n mai galaw ai. Yesu gaw dai numsha kadai re ai (Samari masha) hte shi a prat labau hpe atsawm sha chye ai. Raitim, shi gaw hka lu na matu shi hpang de sa wa ai. Yesu gaw shi hpe shi hkum nan, Htani Htana Hkrung ai Hka hte grau ni htep hkra galaw na matu yaw shada ai.
Katsi katsang re ai hpe jahten kau nna, Yuda masha ni hte Samari masha ni a lapran na shinggyim nga pra masa hte lachyen lahka ai lam ni hpe ninghkap ai hku nna, Yesu gaw ndai numsha hte shi a amyu masha ni a matu Karai Kasang a kumhpa tai wa sai. Dai majaw, Yesu zawn, hkrit tsang ra ai lam ni hpe hkam la na matu jin jin rai nga ra ai. Ndai lam gaw shinggyim wuhpawng hkrang masa hte tara masa ni a n tara ai tara ni hpe ninghkap ai lam rai nga ai. Masha ni hpe n lawm shangun ai bunghku ni hpe jahten kau nna kaga masha ni hpe mai byin ai lam ni hpe hpaw ya ai chyinghka mhkrai rai ra ai. Dai gaw anhte Hkristu hpe hkam sha lu na matu rai nga ai.
Hpang jahtum, Yesu hte numsha a lapran na ga law hkat ai lam gaw, Htani Htana Hkrung nga ai Hka ngu ai Hkristu hpang de masha ni hpe woi wa na matu anhte lai di ra ai pat shingdang lam ni hpe madi madun nga ai. Tsun mayu ai gaw, anhte gaw hpang jahtum e kabu gara shiga hpe n hkap la shi yang, shinggyim wuhpawng anhte hpe madun dan na “rational” stubborness” hpe madi madun nga ai.Raitim, anhte gaw Htani Htana Hkrung nga ai Hka hte matut mahkai nga yang, anhte gaw n-gun n yawm ai sha, grau kaja ai, grau kam hpa mai ai sakse hkam lu na re.