Daini na Ja Chyum Mungga hpe hti sumru yu ai shaloi e, Madu Yesu gaw nat kap ai Masha lahkawng hpe shamai kau ya ai lam hti lu ga ai. Raitim mung dai mare kata hta nga ai ni gaw, Nat tsadan a gyit hkang da hkrum ai kaw na shalawt ya lu ai wa hpe hkap tau la na malai, Madu Yesu hpe shanhte a ginra kaw na pru mat wa ya na matu hpyi nem nga ma ai. Hpa majaw nga yang e shanhte gaw, tsi shamai la lu ai wa a prat hpe yu nna, kabu pyaw na malai, si sum mat ai Wa ni a majaw myit n pyaw nga ma ai.

Anhte yawng hpe mung ga san san nga ai. Anhte a prat hta e, grau kaja na matu shakut nga ai hta, tinang nga manu taw sai shara hta sha galai shai ai lam n nga, matut nna nga pyaw len taw nga sa ga ai kun? Shingrai yang, Madu Yesu hpe anhte a prat hpe lam woi shangun nna, madu a kraw kata na n kaja ai lam gumrawng ai. Ra marin ai. Pawt sindawng ai. Mara n dat ya lu ai. Ndai zawn re ai n kaja ai myit hkam sha lam ni hpe koi yen kau lu na a tsam hpe garum ya na ra ai kun? Madu Yesu hpe e anhte a prat hta ganing re ai mabyin mayak lam ni hta raitim, shi hpe shara jaw let, Madu hpe sha madung manu shadan nna, shi a chyeju a npu e, shingbyi kam hpa nga lu na hpyi nem ga law.