Daini na Ja Chyum Mungga hpe hti sumru yu ai shaloi e, Daw jau ai myit masa hpe na chye la lu ga ai. Anhte yawng gaw ap nawng ai myit masin hte galaw sa wa ga. Anhte marai hkum sahgu hta e, ap nawng ai myit masin nga ra ga ai. Shingrai, ap nawng daw jau ai wa langai mi hku nna, kaga masha ni e shakawn shagrau ai lam hte chyeju dum ai lam masat masa galaw ya ai lam ni hpe n mai hkam la nga ai re. Dai zawn sha Madu Yesu hkum nan mung, masha ni ap nawng daw jau ya ai hpe hkam la na matu, shi du sa wa ai n re. Shi hkum nan ap nawng daw jau na matu she, shi du sa wa ai nga tsun nga ai. (Mt.10: 45)

Ya dai ni nawku hpung kaw nna, Wa sarabyin Leo (1) a poi ninghtoi hpe galaw nga ga ai re. Shi gaw Leo the Great ngu ai Jan mau hpe shawng ningnan hkam la lu ai wa mung re. Shi gaw sarabyin a rung daju rai nga ai Vatican a sari sadang hpe sharawt ya ai wa re. Bai nna, shi gaw Madu Yesu a Karai atai, masha atai dai atai lahkawng hpe atsawm sha tsun sang lang dan chye ai wa mung re. Shi gaw ap nawng ai wa langai mi zawn, nawku hpung ting a lit magam hte shinggyim nau na ni a lit magam lam ni hpe mung kangka ai hte galaw gun hpai ai wa rai nga ai. Dai hte maren anhte yawng mung, tinag a lit magam ni hpe lagawn lamawn n re ai sha, ap nawng daw jau ai myit jasat hte galaw gun hpai na matu shakut sa ga law.