2025 Ning San Columban Poi masat Njang Dung jau ginwang Ramma ni a ginsup shing jawng poi lamang hpe ( 16. 11. 2025 ) ya shani Ginwang up Wa Jau Patrick Zinwa Brang Di kawn akyu hpyi shaman nna hpaw hpang ya sai.
Ndai Ramma La ni a Gawdin Ginsup shingjawng lamang Namjim Sara Gaiwang, Namjim St. Mary Nawku Jawng wang Gawdin pa hta 23 /11/2025 ya shani du hkra ginsup shingjawng mat na rai nna, Ramma num ni Fusal Gawdin shingjawng lamang hpe gaw Rada Kawng (Aung Star ) Fusal ginsup shara hta 22/11/2025 ya shani shingjawng mat na re lam Njang Dung Jau ginwang Ramma ningbaw Shd.Columban Nhtawng Tu Gum Ja Naw shiga jaw ai hku nna chye lu ai.
Ndai San Columban hpe shakawn shagrau ai Gawdin Ginsup shingjawng lamang hta Njang Dung, Rada kawng, Chyarapati hte Namjim Sara gaiwang kata na ramma ni shanglawm shingjawng nga ai lam chye lu ai.
Yaw shada lam
1.Ramma ni makam masham hta ngang kang let shakut shaja sa wa na matu.
2.Ramma ni sasana magam hta myit hkrum myit ra gahkyin kumdin sa wa lu na matu.
3.Ramma ni Nanghpam hpe koi yen kau nna hkam kaja zet tsang ai ramma ni byin tai wa lu na matu yaw shada nna woi awn galaw ai rai nga ai.
Ramma La ni a Ninggang kashun shingjawng lamang (final) hpe 23/11/2025 ya shani Namjim St. Mary Nawku Jawng wang hta galaw mat na re lam chye lu ai.
Njang Dung Jau Ginwang Ramma ni San Columban hpe shakawn shagrau ai Gawdin shingjawng poi hta sa du yu n gun jaw la na matu Njang Dung Jau Ginwang Ramma kaw nna mung saw shaga dat nga ai.
