Daini anhte jawm sumru akyu hpyi na ga baw hpe, Marked by Joy
Kabu Gara ai Lam hte Masat Da Hkrum ai ngu ai hpe la ga.
Ga Shagawp Laika, daw kaba shi: daw kaji hkun-matsat (10:28) hta,
“Dinghpring ai ni a myit mada lam gaw, kabu gara lam rai nga ai; Tara n lang ai ni a myit mada lam chyawm gaw, hten mat na ra ai” nga nna tsun da nga ai.
Anhte a makau grup-yin masa lam amyu myu a lapran hta hpring kabrat ai kabu gara lam hpe lu hkam la ai ngu ai gaw, kaning san ai rai na kun? KaraiKasang anhte hpe jaw mayu ai kabu gara ai lam a tsawm htap ai gaw n wai mat lu ai, ngang grin nga ai, anhte hpe madi shadaw ya ai, n-gun atsam rawng nna teng nga ai.
Sumsing lamu na anhte a Kawa Karai gaw, shi hte anhte langai sha rai, galung kahkin pawng hpawm wa na hkrun lam hta, Mungkan a pyaw hpa lam ni hta grau ai kabu gara ai lam hte masat hkrum na matu saw shaga nga ai. Anhte a Karai kasang gaw kabu gara ai lam a Karai Kasang rai nga ai. Pyaw hpa lam ni hpe shabyin ai wa rai nna, nhpaw n-ya asak hpe jaw ya ai Madu rai nga ai. Shi a kasha ni, shi a mai kaja ai hpe hkam sha chyim lu na hpe ra sharawng nga ai (Shakawn 334:8).
Ndai Mungkan a ru tsang ai lam ni hpe kabai kau nna, sumsing mungdan a matu asak hkrung ai kaw na lu la ai kabu gara ai hpe hkam la shangun mayu nga ai.
Roma daw kaba shi-mali: daw kaji shi-sanit (14:17) hta,
“Kaning rai nme law, Karai Kasang a mungdan gaw, sha sha, lu lu rai na hku n re ai sha, Chyoi Pra ai Wenyi e, dinghpring ai, ngwi pyaw ai hte kabu gara ai, rai nga ai” nga nna Kasa Pawlu tsun da ai.
Bai, Shakawn Kungdawn, daw kaba shi-kru: kaji shi-langai (16:11) hta,
“Asak de woi sa ai lam nang ngai hpe madun nit dai; Na a man e, hpring tsup ai kabu gara lam nga nga ai; na a hkra maga e ngamu ngamai ai gaw htani htana rai nga ai” nga nna Shakawn Kungdawn sara wa yin la da nga ai.
Dai hte maren Ga Shagawp Sara wa mung, shi a laika, daw kaba shi: kaji hkun matsat (10:28) hta,
“Dinghpring ai ni a myit mada lam gaw, kabu gara lam rai nga ai; Tara n lang ai ni a myit mada lam chyawm gaw, hten mat na ra ai” nga nna shadum da nga ai.
Anhte a prat hta Hkristu Madu hte rau shadang tup hkrak, rau kanawn mazum nga ai lu ai hta grau kabu gara na lam n nga sai. Htaw sumsing mungdan a matu, dinghta ga ntsa e kabu gara let asak hkrung hkawm sa lu na matu gaw, ndai dinghta ga ntsa na anhte hpe lit li shangun ai lam ni yawng hpe kabai kau nna sumsing lamu kaw nna jaw ai ngang grin ai kabu gara ai hpe tam ra ga ai.
Wa Karai Kasang gaw, anhte a Mungkan hkrunlam a matu grai myit tsang ya ai. Anhte lam dam mat jang, shi hkrap nga ai; Hpyen wa a bungli hpe shi grai pawt sindawng nga ai. Anhte a matu mai kaja ai shi a masing hpe anhte ningdang kau nna, htum mat, wai mat lu ai, Mungkan a lam ni hpe lata la jang, shi grai yawn nga ai. Rai tim, yawng hpe shi bai hkye mawai la lu na aten hpe shi myit mada nna kabu gara nga ai.
Shingran laika, daw kaba hkun-langai: kaji mali (21:4) ning nga tsun da ai,
“Shi gaw shanhte a myi hta na myi prwi pru mapru katsut kau ya na ra ai: htawm hpang e si hkrung si htan n nga lu na sai; sharung shayawt ai, hkrap ngu hkrap ngoi ai, hki si, ba si ai mung, n nga lu na sai: shawng na lam nga manga hte gaw lai mat wa sai.”
Anhte Madu Yesu a ga matsun ni hpe hkan shatup nna, anhte hta shi galaw mayu ai lam ni hpe galaw na ahkang jaw yang, dai kabu gara ai hpe dinghta ga ntsa hta pyi, anhte hkam la lu na ga ai. Kasa Yaku dai hpe madi madun ya ai; shi a shagun laika, daw kaba langai: kaji lahkawng kaw nna mali (1:2-4),
Ya, asim sha nga nna sumru akyu hpyi ga.
- Kabu gara ai gaw ahkyak ai, na a matu san da ya nga ai lam hpe sumru yu u.
Esaia daw kaba manga-shi-manga; kaji shi-lahkawng (55:12) hta na Karai Kasang a shalan shabran ai ga hpe madat yu ga,
“Nanhte gaw kabu gara let pru wa nna, ngwi pyaw ai hte woi wa ai hkrum na myit dai; bum ni hte kawng ni, nanhte a man e mahkawn mangoi ai nsen hte garu nna, nam mali na hpun ni yawng, lahpawk dum na mara ai.”
- Nang kabu gara ai hpe hkam la na matu pat shingdang da ai lam hpa mi rai kun? Nang hpe myit lit li hki ba shangun ai lam ni gaw hpa rai kun? Dai lam ni hpe kabai kau lu hkra, Karai kasang kaw garum hpyi u.
Kasa Yaku shadum ai ga hpe bai sumru yu ga (Yaku 1:2-4):
“Nye a hpunau ni e, nanhte a kamsham ai myit hpe dinglik yu ai hkrum yang, shakut sharang chye ai myit jat nga ai hpe, nanhte chye nga myit dai majaw, agung alau amyu myu hpe kadup hkrum myit dai shaloi e kabu gara shara kaba rai nga ai, myit la mu. Dai hta n-ga nanhte hkum hkum chyip chyip rai lu nna hpa hta mung n kadawn myit ga, shakut sharang ai myit gaw tinang a atsup nga ai bungli hpe, shangut kau lu u ga.”
- Wa Karai a simsa ai shang-wang hta ban sa la nna, shi a salum hta rawng ai lam hpe tam ga.
Shakawn Kungdawn laika hta tsun da ai gaw: “Asak de woi sa ai lam nang ngai hpe madun nit dai; Na a man e, hpring tsup ai kabu gara lam nga nga ai; na a hkra maga e ngamu ngamai ai gaw htani htana rai nga ai” (16:11).
Dai gaw Karai Wa a salum hta rawng ai lam rai nga ai.
Ndai lam ni hpe anhte a myit masin kraw lawang hta gun da, tatut hkan sa lu ga yang gaw, kabu gara ai hte masat da hkrum ai ni tai na ga ai law.
Yawng hpe Wa Karai kabu gara ai chyeju jaw ya u ga!