Daini na Ja Chyum Mungga hpe hti sum ru yu ai shaloi e, Madu Yesu gaw, Kasa shi lahkawng hpe sasana magam gun hpai na matu, ra ai lam ni hpe sharin ya nna, lahkawng yep yep di nna shangun dat wu ai. Madu Yesu gaw sasana magam hta hkrum ang wa na mayak jam jau lam ni, ninghkap wa na lam ni, tinang a myit hta n hkap la lu na lam ni, tau nau koi yen ra na hte hkan sa shatup na lam ni hpe sadi jaw shadum ya htet dat ya nga ai. Hkrun lam a matu hkyepdin, nhpye, gumhpraw kaga shajan n la sa na matu mung shadum nga ai.

Dai gaw shanhte a sasana magam lam hta, tinang la sa ai rung rai hta myit marin nga na hta, Karai Kasang hpe grau kam hpa let, akyu hpyi ai, kaga masha ni hpe tsawra myit majing hte matsan jam jau ai ni hpe mung Karai Kasang a mungdan ni magang wa ra ai. Dai lam ni hpe n-gup aga hte sha n rai, ta tut magam hta mung sakse hkam na matu shadum dat nga ai. Madu Karai a hkau na pa hta, galaw na magam bungli grai law nga ai. Anhte mung Madu Karai a hkau na pa hta, amu galaw nga ga. Dai ni gaw san pra ai Ma Yesu a Tesrsa a poi shani rai nga ai. Shi gaw du daw sai hkaw hkra rai ap nawng daw jau ai a majaw San pra ai masha tai wa ai n re. Shani shagu galaw na magam lam ni hpe, shawoi hta loi mi laklai ai hku lit hpe tup hkrak galaw sa ai majaw rai nga ai. Shi a tsawra matsan dum lam, shagrit shanem ai mai kaja ai lam ni gaw, Madu Karai Kasnag  ra sharawng ai magam bungli rai nga ai. Anhte yawng mung, San pra ai Tesrsa zawn, galaw sa ra ai magam ni hpe tsawra myit, shagrit shanem ai myit ni hte lit magam ni hpe tup hkrak galaw sa wa ga law.